қаруды қайта оқтау

(Перезаряжение оружия)

қаруды кезекті атысқа дайындау процесі. Қ.қ.о. төмендегі операциялардан тұрады: бекітпені ашу; ұңғы каналын ашу; оқтықтан (камерадан) оқсауытты шығару; қарудан оқсауытты лақтыру; қабылдағышқа кезекті оқты (атыс элементін) жіберу; оқты оқтыққа енгізу; ұңғы каналын жабу; бекітпені жабу; соққы тетігін қайыру. Қ.қ.о. операциялары және олардың орындалу кезектілігі қару түрлерінде оқтау тәсіліне (бірыңғай, жекеленген, сауытты, картуздық), автоматтандырылу дәрежесіне (автоматтандырылмаған, жартылай автоматтандырылған, автоматтандырылған), қайта оқтауды орындайтын тетіктердің құрылысы мен автоматтандыру жұмысы принциптеріне байланысты өзгеруі мүмкін. Кейбір операциялар бір мезгілде орындалуы немесе мүлдем орындалмауы мүмкін. Мыс., автоматтандырылған қаруларда, әсіресе көп ұңғылыларда бір мезгілде бірнеше операция орындалады; картуздық оқтауда оқсауытты шығару және лақтыру, ал бос бекітпелі автоматтандырылған қаруда бекітпені ашу мен жабу орындалмайды. Автоматтандырылмаған қаруларда қайта оқтау, әдетте, қолмен орындалады, жартылай автоматтандырылған қаруларда операциялардың бір бөлігі қолмен, ал қалғандары автоматты түрде орындалады. Автоматтандырылған қаруларда қайта оқтау толығымен автоматты түрде орындалады. Қ.қ.о-ды автоматтандыру қарудың атыс жылдамдығын жеделдетуге мүмкіндік береді.